مش زمان كثير ...
زمان من ٥٠ سنة قبل وجود الهاتف المحمول والانترنت والتلفزيون وقبل ما الناس تعرف الشاشات , كانت الناس لما تقعد مع بعض تحكي مع بعضها عشان هيك كانت الناس تعرف تحكي وتضيف قيمة وطاقة لبعضها ...
زمان لما كان الانسان يكون لوحده كان يخلق شغل من تحت الارض من الملل ، وهذا الشي كان يخليه بنتج وينجز باستمرار ويكسب صحته لانه بيعمل مجهود بشكل مستمر ...
زمان كان االانسان لما يكون لوحده وما عنده شغل ، كان يتأمل بشكل فطري وتركيزه يكون بنسبة ١٠٠% مع نفسه ، هذا التأمل اللي اليوم بنروح ناخذله دورات عشان نعرف كيف نكون مع نفسنا ...
الأشياء اللي كانت فطرياً عادية وطبيعية اليوم صارت رياضة ، مثل انك تحكي انا رايح امارس رياضة المشي ، او رايح اعمل تمارين تنفس ، او رايح اخذ كورس تأمل ..
اليوم جيل ما بعد ال2000 ما بيعرف يحكي ، ولو حكى معك ما بيتطلع بوجهك ولا بتحس بتعابير ولا طاقة ، جييل مغيب منوم مغناطيسياً ، مشتت ذهنياً ، جيل بيمل بسرعة وبيكتئب بسرعة ، وبيسخط بسرعة ، وطلع مرض جديد اسمه ADHD فرط الحركة وتشتت الانتباه ، لو بدك تشخص صح 70% من الناس بيعانو منه ...
#رائد_بدير
