دليل مناعة الأطفال: دور الغدة الزعترية والتعرض الطبيعي للميكروبات

مواقف يومية وأهمية فهم المناعة

إذا بتقرأ المنشور رح تستفيد ، واذا بتشاركه ستؤجر ، انا من النوع اللي ما بحب احكي كثير واهدر طاقتي ، وكثير بيصير معي مواقف بتطلب شرح وتفصيل ومش دائما بيكون معك الصفاء الذهني والوقت تشرح.

أحد المواقف التي تكررت معي ، لما إبني يكون معه قطعة فاكهة او شي بياكل فيه ويوقع منه عالأرض ، كنت أحكيله طوله وكله ، وأكثر من مرة الموجودين ينظرولي بإستغراب وحتى مرة حد حكالي انت دكتور وبنتعلم منك ، هذا لازم ينغسل وبكتيريا وميكروبات ومن هالحكي.

دور الغدة الزعترية والخلايا التائية

في عضو في جسمنا كثير منكم ما بيعرفوه إسمه الغدة الزعترية موجودة في منتصف الصدر، هاي عند الأطفال بتكون في أوج حجمها ونشاطها وبعد ال١٥ سنة بتبلش تضمر وتستبدل بنسيج دهني يعني عند البالغين شبه غير موجودة ، وظيفتها تدريب الخلايا المناعية للطفل.

تحديداً تدريب خلايا إسمها الخلايا التائية ، والخلايا التائية هاي بالضبط دورية الشرطة في جهاز المناعة اللي بتفرق بين الجسم الدخيل وأنسجة الجسم وبتقدر وبتقرر اذا هالميكروب أو هالجسم الدخيل بيستدعي رد فعل مناعي أو لا ومقدار وكمية رد الفعل المناعي ، وبتصنعله أجسام مضادة وبتحتفظ فيها لعشرات السنوات بل مدى الحياة.

أهمية الجرعات الصغيرة من الميكروبات

هاي الجرعات الصغيرة من شتى انواع الميكروبات هي اللي بتدرب الجهاز المناعي لطفلك ، وهي اللي بتخليه ما يعاني في المستقبل من الحساسية وأمراض المناعة الذاتية ، إذا الخلايا التائية ما تدربت بشكل كافي أو ما تعاملت مع ميكروبات كفاية في الطفولة وهي الغدة الزعترية التي بمثابة المعسكر موجودة ، مناعة جسم طفلك رح تصير تعمل ردود فعل على أشياء مش لازم تعمل ردة فعل عليها مثل شوية غبار او رحيق ازهار أو لسعة نحلة او ناموسة أو أكل معين بما يعرف بالحساسية ، أو الخلايا التائية الغير مدربة كفاية ، رح تصير تهاجم أنسجة الجسم ، بما يعرف بامراض المناعة الذاتية وهي قائمة من أكثر من ٨٠ مرض منتشر وشائع.

التأسيس السليم والمناعة الفطرية

خلي إبنك يتسخ ويلعب بالتراب والطين ، فطرياً الطفل بعد الشهور الأولى من الولادة بيبدأ يحط اي شيء بتمه عشان يدخل لجسمه اكثر تنوع ممكن من الميكروبات الموجودة في بيئته. وإذا مش مصدق كلامي او حاسه مبالغ فيه ، روح على أي مشفى على قسم الأطفال ، وشوف كم طفل معه تسمم لأنه اكل تفاحة وقعت عالأرض وما انغسلت ، وشوف كم طفل بيعاني بسبب انه لم يتم تأسيس مناعته بالشكل الفطري والسليم.