بالله عليك تسمع إحدى التجارب المضحكة المبكية التي أجريتها مرة ...
البنات اللي بيتابعو صفحة( #فيتامينات_وأكثر) اللي مراجعيني بياخذو المكملات من خلالها ، إشتكو من فظاظة تعامل الناس وأنهم بيعاملوهم كأنهم ذكاء أصطناعي لدرجة البعض بيدخل عالصفحة يطلب ما بيحكي مرحبا أو شكراً و ما عندهم صبر نهائياً ، وأنه كيف الشخص بيكون صابر على نفسه سنوات بدون علاج وبس يجي عندي ما بيقدر يصبر أسبوع لأنه احيانا بعض المنتجات بتكون مقطوعة من المصدر لكثرة الطلب عليها وأنا منبه ممنوع يعطو بديل قطعياّ ..
فأنا إقترحت عليهم في كل طرد بتطلعوه حطو بداخله كيس صغير بحجم نصف كف اليد ، ويكون فيه تشكيلة مكسرات فاخرة أو شوكلاته داكنة على حسابي الشخصي وفعلاً انا أعطيتهم كمية مكسرات جوز برازيلي ولوز ومكاديميا ، وكمية شوكلاته داكنة ، وطلبت منهم يكتبو على كل كيس عبارة شكراً لأنكم إنتظرتونا ووثقتو فينا ، وهذا فعلاً تعبيراً عن تقدير صبر العميل وثقته بي أنا شخصياً ...
بتحبو تسمعو النتائج...
* قسم بعثو يسألو عن هذه الهدية بإستهجان وفظاظة اكثر وكان سؤالهم للصبية الي على الصفحة شو قصدك ..؟🤣
* قسم من الشباب فكر الصبية اللي على الصفحة بتعرفو ومعجبة فيه وحاطيتله هدية شخصياً وبعث يتناغش ويخفف دم ...🤣
* قسم زوجها للسيدة المستفيدة من الطرد ، أصر يرجع يبعث للصفحة ويتأكد أنو اللي عليها صبية لأنه شك أنه اللي عليها شب وباعث لزوجته هدية خاصة ...🤣
* وفي قسم ولو قليل شكو انه هذه الهدية فيها سحر وبدنا نسحرهم سحر مأكول... 🤣
* القسم الأكبر حكى طبعاً ولولاهم ربحانين كثير ما بيحطو هيك شي ..🤣
* من بين أكثر ١٠٠ طرد طلعو بهالشكل ، زبونين فقط رجعو للصفحة وحكو شكراً على اللفتة الحلوة وهذا من ذوقكم
طبعاً معظم المعلومات اللي فوق وصلتني من خلال معارفي ومراجعيني ، الشيء مضحك وبنفس الوقت مرعب ومبكي وعميق ، الناس لم تعد تؤمن بالخير لجرد الخير والإحترام لمجرد الإحترام ، والمعضلة الحقيقة الآن كيف لنا أن نرتقي ونكفل الصالح العام في مجتمع من الخائفين المرتابين ...
ومع ذلك حتى الآن ليس لدي أي نية في مغادرة البلاد 🤣...
#رائد_بدير
