من الأسباب اللي بتخليني انشر على صفحتي بإستمرار بالرغم من المعيقات وإني ما اكتفي بتوعية مراجعين عيادتي ، إني متأكد انها بتساعد على الأقل شخص واحد يومياً هذا إذا ما بتنقذ حياته..
لليوم بتذكر اول مرة أخذت فيه هذا القرار أنو لازم أعمل منصة لتوعية الناس ، كنت نازل من عمارتي وكان فيه شخص من عمري جاي يزور أحد أقاربه المستأجرين عندي بالعمارة ، لما التقيت فيه على الدرج متذكر تماماً انه كان طلع ١٨ درجة وتعمدت انتبه لعددهم لما شفت حالته وكان واضع ايد على الجدار وايد على صدره وبيلهث بقوة وبيرتاح ، ومتذكر اني القيت عليه السلام ما قدر يرد وبدا وكأنه سيستفرغ ...
لم يكن قد تجاوز ال٣٥ ، قلتله سلامتك اقعد ارتاح بعد ما ارتاح شوي وقدر يحكي قلي ما انا بتعالج لمعدتي صرلي سنتين في عندي مشكلة بالمعدة ، ما قدرت اقله بشكل مباشر ولكن قلتله لازم تراجع دكتور قلب بأسرع وقت معدتك ما فيها شي ، بتذكر انه صار يضحك وقلي شو بيعرفك انت معدتي صرلي فترة طويلة بعالج فيها وشفت الدكتور الفلاني والبروفيسور الفلاني ، هاد كلو من معدتي ...
ما قدرت اشرحله وأناقشه ولكن اصريت عليه انه لازم يراجع دكتور قلب ويعمل فحوصات اليوم قبل بكرا ، صار يضحك وتركني وكمل طلوع الدرج ..
بعد شهرين توفى بجلطة الله يرحمه ويجعل مثواه الجنة ..
#رائد_بدير
